ACTUALIDADE

Cativos da Raiola reinterpretan "O zapateiro"

06 · outubro · 2016

Os cativos da escola infantil Raiola de Santiago gozaron onte do contacontos O zapateiro no bosque a cargo da autora do libro, María José Gulín. Ao rematar a actividade, as alumnas e alumnos do centro ilustraron a historia.


A escola infantil Raiola de Santiago recibiu onte, mércores, a visita da escritora María José Gulín, quen fixo catro sesións de contacontos, dúas baseadas no libro Unha escola nas nubes para os estudantes de máis idade e outras dúas do conto O zapateiro no bosque para os máis novos. Foron estes últimos, nenas e nenos de 4 e 5 anos os que, tras rematar a sesión, fixeron a súa persoal interpretación da obra en forma de debuxos, algúns realmente sorprendentes.

Cativos da Raiola reinterpretan
Edición

As sesións de contacontos en colexios continuarán o día 17 de outubro no CEIP Lamas de Abade –onde a autora estará acompañada da ilustradora Antía Barba–, o día 24 no CEIP Raíña Fabiola e o día 26 no CEIP das Fontiñas.

Pero este sábado, 8 de outubro, haberá unha sesión aberta a todo o mundo na libraría Cronopios de Santiago (rúa Alfredo Brañas). A partir das 12:00 h María José Gulín fará un contacontos baseado no seu último libro O zapateiro e o raposo, que se repetirá o sábado 22 de outubro, ás 12:30 h, na libraría Couceiro, situada na praza de Cervantes. As dúas sesións son de acceso libre e totalmente gratuítas.

GALERÍA